மகாபாரதத்தை ஒரு புராணமாக, ஞான நூலாக அணுகுவோர் உண்டு. அதே நேரம் அதன் தொன்மங்களைத் தொட்டெடுத்து, சுருளவிழ்த்து, அரசியல் பிரதியாகப் புரிந்து கொள்ளவும் இடமுண்டு. இதில் மானசா இரண்டாம் வகையில் வரும் நூல். குரு குலத்திற்கும் நாக குலத்திற்குமான தொடர்பை இனப் பகை, இன அழிப்பு, தொடரும் வஞ்சங்கள், பின் ஒரு கட்டத்தில் சமரசம் என்பதாக புரிந்து கொள்வதே இதன் வழிமுறை. இதன் நாயகியான மானசா வங்கம், கலிங்கம், ஆந்திரம் வரையிலான கீழைக் கடற்கரைப் பிரதேச மக்களால் வழிபடப் பெறும் ஒரு நாட்டார் தெய்வம்.

தங்கையாக, மனைவியாக, தாயாக என எல்லா நிலையிலும் தன் கடமைகளைச் சிறப்பாக நிறைவேற்றிவிட்டு, அதற்குப் பின்னர் தனக்கும் தனியான தேடல்கள் உண்டு என்றும், அதை நோக்கிப் பயணிப்பது தன் உரிமை என்றும் பிறருக்கு உணர்த்தியவள் இந்த நாகினி. நிலத்தில் யார்க்கும் அஞ்சாத நெறிகளும், நிமிர்வும் கொண்ட மானசாவின் கதை இது.

நாக குலங்கள் இங்குள்ள மற்ற இனத்தோடு இரண்டறக் கலந்துவிட்டமையே இந்த வழிபாடுகளின் மூலப்புள்ளி. தமிழ்நாட்டைப் பொறுத்தவரை நமக்கு தனிப்பட்ட தெய்வங்களாக மானசா என்றோ வாசுகி என்றோ வழிபடும் வழமை இல்லாவிட்டாலும் கூட அரச மரத்தடிகளில் நாகப் பிரதிஷ்டை இல்லாதிருப்பது அபூர்வம். புற்றுக் கோவில்களும், நாகாத்தம்மன்களும் இல்லாத ஊர்கள் கிடையாது.

ஐந்து பேரையும் மணந்து, பாரதத்தின் பேரரசியாக ஆக அவர்களைப் பகடைக்காயாகப் பயன்படுத்தினாள் என்றும் திரௌபதி குறித்து எழுதலாம். இன்னும் முன்னகர்ந்து குந்தியே கூடத் தன் பேராசையால் பிள்ளைகளைத் தூண்டி பாரதப் போரை உருவாக்கினாள் என்றும் எழுதலாம். சுயமான பாலியல் தேர்வு கொண்ட தேவயானி, தமயந்தி, குந்தி, திரௌபதி என அனைவரையுமே பேராசைக்காரர்களாகவும், ஆதிக்க புத்தியுள்ளோராகவும் செதுக்கி வைக்கவும் முடியும். எந்தத் தரப்பிலிருந்து நாம் புனைவுகளை உருவாக்குகிறோம் என்பதை நமது கருத்தியலே முடிவு செய்யும்.

இளம் வயதில் கேட்ட கதைகள் என்பதால் ராமாயணத்தை ராமனின் பக்கமிருந்தும், பாரதத்தை பாண்டவர் பக்கமிருந்தும் மட்டுமே நினைக்கப் பழகியிருந்த மனதிற்கு, மகா ஸ்வேதா தேவியின் ஒரு படைப்பு புராணங்களுக்குள் புதையுண்டிருக்கும் விளிம்பு நிலை மனிதர்களின் மீதான கரிசனமின்மையை உடைத்து முன் வைத்தது. குந்தியும் நிஷாதப் பெண்ணும் என்ற அந்தக் கதை மரபான சூழலில் வளர்ந்து வந்த எனக்கு அளித்த அதிர்ச்சி மிகவும் அதிகம். அடுத்தது இவரது காட்டில் உரிமை எனும் படைப்பு, அது அளித்த பீர்சா முண்டா எனும் தலைவனின் அறிமுகம் என அந்த இளம் வயதில் என்னை மிகவும் பாதித்த எழுத்தாளுமை மகா ஸ்வேதா தேவி.